अर्घाखाँचीमा जीप भिरबाट खस्दा, ३ को मृत्यु
अनलाइनखबर पाटी १९ असार २०७६, बिहीबार
कपिलवस्तुको कृष्णनगरबाट सन्धिखर्क जाँदै गरेको लु १ ज १३२९ नम्बरको जीप भिरबाट खसेर दुर्घटना हुँदा ३ जनाको मृत्यु भएको छ, ४ जना घाइते छन्।
गोरुसिंगे सन्धिखर्क सडकखण्डको सीतापुर सुपादेउराली मन्दिर नजिक जीप दुर्घटना भएको हो। जीप करिब साढे ३ सय मिटर तल खसेको छ।
अर्घाखाँचीका सहायक प्रमुख जिल्ला अधिकारी विष्णुराज बेल्बासेका अनुसार ३ जनाकै घटनास्थलमै मृत्यु भएको हो। मृतकहरू मध्ये २ जनाको सनाखत भएको छ।
मृत्यु हुनेमा भूमिकास्थान नगरपालिका–३ का सुमन्त भुसाल र मालारानी गाउँपालिका–३ का रुदप्रसाद भुसाल छन्। सुमन्त गाडी मालिक पनि हुन्। उनैले चलाइरहँदा जीप दुर्घटना भएको हो। मृतकमध्ये अर्का एक जनाको सनाखत हुन सकेको छैन।
घाइते मध्ये २ जनाको अवस्था गम्भीर रहेको बेल्बासेले बताए। गम्भीर घाइतेहरूलाई उपचारका लागि बुटवल लगिएको छ।
Leave a Reply